खेतां री रुखवाळी करतां
डागळे चढ़ बैठ्यो तावड़ो ।
फूलां सूं लदग्यो आकड़ो ।
छौड़ो आज री अबै
करां तो काळ री बातां ।
नींदां सूं सगळी
उधड़ी-उधड़ी हो गई रातां ।
दुःख रो तो राजपथ चौडो
सुख रो गैळो घणों सांकड़ो ।
डागळे चढ़ बैठ्यो तावड़ो ।
थारी-म्हारी करता-करता
कटगी उमर सारी ।
कदै चासणी मीठी तो
कदै वा लागी खारी ।
म्है तो थाक्यो तौक-तौक’र
गैळा माय बिछ्यो लाकड़ो ।
डागळे चढ़ बैठ्यो तावड़ो ।
दन तो बौदा बीतरैया
बगत री हैरा फैरी ।
मन यो बावळो
फेरू आस बंधारयो बैरी ।
करिया घणा ही जतन जाप्ता
देव-देवरा रोयौ दुखडो ।
डागळे चढ़ बैठ्यो तावड़ो ।
प्यारचन्द शर्मा 'साथी'
3 ई 55
न्यू हाउसिंग बोर्ड
शास्त्री नगर भीलवाड़ा राजस्थान
मो 9468608462